Хөдөө Аж Ахуйн Их сургууль (ХААИС) нь хагас зууны турш улс эх орондоо хөдөө аж ахуйн мэргэжилтэй боловсон хүчнийг бэлтгэж өгсөн Монгол орны ууган дээд сургуулиудын нэг юм. Тус сургуулийг төгсөгчид зөвхөн хөдөө аж ахуйгаар зогсохгүй эх орныхоо нийгэм, эдийн засаг, шинжлэх ухаан, соёлын салбаруудын хөгжилд ч ихээхэн үүрэг гүйцэтгэсээр ирлээ. Монгол орны, ялангуяа хөдөө аж ахуйд гарсан хөгжил дэвшил бүхэн тус сургуулийн үйл ажиллагаатай салшгүй холбоотой юм.
Эдүгээ манай орны өнцөг булан бүрт бэлчиж яваа таван хошуу мал, ургаж байгаа таримлуудын дотор тус сургуулийг төгсөгчдийн гаргасан шинэ үүлдэр, сортууд зонхилж, байгалийн өвс ургамлаас дуртайгаа сонгон иддэг бэлчээрийн мал аж ахуйг эрүүлжүүлэх ажилд ахиц гарсны үр дүнд малын тоо толгой жилээс жилд өсч хүн амтайгаа харьцуулахад 15 дахин ихэслээ.
Өнөөгийн ХААИС нь бүрэлдэхүүний 8 сургууль, хөдөөгийн 2 салбар, эрдэм шинжилгээний толгойлох 4 хүрээлэн, 2 станц бүхий орчин үеийн багаж, төхөөрөмжөөр бүрэн тоноглогдсон лабораториуд, 9000-аад суралцагчид, ажиллагсдыг багтаасан боловсрол-шинжлэх ухааны томоохон төв болтлоо хөгжлөө. Шинэ зуунд манай сургууль дэлхийн жишигт хүрсэн мэргэжилтэн бэлтгэж, унаган төрхөө алдаагүй өргөн уудам нутгийнхаа ариун тансаг хүнсээр монгол түмнийгээ хангах үйлсэд улам их хувь нэмэр оруулаад зогсохгүй бусад орны ард түмэнд ч хүртээнэ гэдэгт итгэл төгс байна.

Академич Б.Бямбаа